Bólusetning gegn inflúensu 2006
Dreifibréf Landlæknisembættisins nr. 8/2006
Tilkynning frá sóttvarnalækni
Bólusetning gegn inflúensu
Þrígild bóluefni gegn inflúensu (A og B stofni) á norðurhveli fyrir tímabilið 2006-2007 hafa verið framleidd samkvæmt ráðleggingum Alþjóðaheilbrigðismálastofnunarinnar
(WHO Weekly Epidemiological Record, 2006;81:81-88).
Talsverðir erfiðleikar hafa verið á framleiðslu inflúensubóluefna á þessu ári sem rekja má til lítils afraksturs í ræktun veiru sem mælt var með að nota. Þetta hefur leitt til þess að búast má við töfum á afgreiðslu bóluefnanna. Fyrstu skammtarnir berast væntanlega ekki fyrr en um og upp úr miðjum októbermánuði nk.
Það eru eindregin tilmæli sóttvarnalæknis að áhættuhópar njóti forgangs við inflúensubólusetningar á þessu hausti.
Áhættuhóparnir eru:
- Allir einstaklingar eldri en 60 ára.
- Öll börn og fullorðnir sem þjást af langvinnum hjarta-, lungna-, nýrna- og lifrarsjúkdómum, sykursýki, illkynja sjúkdómum og öðrum ónæmisbælandi sjúkdómum.
Heilsugæslustöðvarnar eru hvattar til að panta bóluefni sem fyrst og kalla fyrst og fremst ofannefnda áhættuhópa inn til bólusetningar.
Sóttvarnalæknir vill einnig minna á tilmæli um bólusetningu gegn pneumókokkasýkingum hjá eftirtöldum hópum:
- Öllum eldri en 60 ára, á 10 ára fresti.
- Einstaklingum með aspleniu eða aðra ónæmisbælandi sjúkdóma, á 5 ára fresti.
Seltjarnarnesi, 21. september 2006
Sóttvarnalæknir
Sent heilsugæslustöðvum, heimilislæknum í Reykjavík, yfirlæknum og hjúkrunarforstjórum sjúkrahúsa, lyfjabúrum sjúkrahúsa, læknastofum og stofnunum fyrir aldraða.
Afrit sent Heilbrigðis- og tryggingamálaráðuneytinu, Lyfjastofnun, Læknablaðinu og Tímaritinu Hjúkrun.
Uppfært 28. nóvember 2008